साउन ३१, पर्वत । पर्वतको जलजला गाउँपालिकामा निर्मित कृषि उपज संकलन केन्द्रमा गाउँका किसानले उत्पादन गरेको तरकारी र खाद्यन्न संकलन गर्न शुरु भएको छ ।

आफ्नो उत्पादन आफ्नै बजार, समृद्ध किसान उन्नत कृषिको आधार भन्ने उद्देश्यले गठन भएको जलजला कृषि बजारको सक्रियतामा मिलनचोकमा निर्माण भएको कृषि उपज संकलन केन्द्रमा तरकारी र खाद्यन्न संकलन हुन थालेको हो । कृषि समूहका अध्यक्ष राजु आचार्यले संकलन केन्द्र शुरु गरिएको र किसानको उत्पादन बजार पठाउन थालिएको बताउनुभयो । एक दुई दिनमा संकलन केन्द्रको तरकारी बजारीकरण गर्न गाडीको पनि व्यवस्था हुने आचार्यले जानकारी दिनुभयो ।

कृषि निर्देशनालय पोखरा, जलजला गाउँपालिका र स्थानीय कृषकहरुको लगानीमा संकलन केन्द्र स्थापना गरिएको हो । कृषि उपज संकलन केन्द्र स्थापना भएपछि गाउँमा उत्पादित तरकारी तथा खाद्यन्नले बजार पाउने र स्थानीय बजारमा भन्दा बढि मुल्यमा विक्री गर्न सकिने किसानहरुले बताएका छन् । यो संकलन केन्द्र कृषि निर्देशनालयको २७ लाख, जलजला गाउँपालिकाको १५ लाख र उपभोक्ताहरु मार्फत ४२ लाख लगानी गरि स्थापना गरिएको हो ।

शालिजा, धाईरिङ, लेखफाँट, नाग्लीवाङ, वाँसखर्क, मल्लाजमा व्यवसायिक किसानहरुले उत्पादन गरेको तरकारी र खाद्यन्न बजारमा ल्याउन थालिएको छ ।