पर्वत । पर्वत अस्पतालमा शुरु भएको डायलासिस सेवा शुरु भएकोमा सेवालाई प्रभावकारी बनाउन कुश्मा नगरपालिकाले आवश्यक सहयोग गर्ने प्रतिबवद्धता जनाएको छ ।

कुश्मा नगरपालिकाका प्रमुख, उपप्रमुख सहित जनप्रतिनिधीहरु पुगेर सेवाको प्रभावकारीतामा सहयोग गर्ने प्रतिबद्धता जनाउनुभएको हो । नगरपालिकाको समन्वयमा प्रदेश सरकारले डायलासिस सेवा सञ्चालन गर्न सहयोग गरेकोमा नगरप्रमुख रामचन्द्र जोशीले प्रदेश सरकारलाई आभार व्यक्त गर्नुभएको छ भने अस्पताल विकास समितिलाई प्रभावकारी सेवा सञ्चालन गर्न अनुरोध गर्नुभएको छ ।

जोशीले जिल्ला अस्पताल पर्वतमा डायलासिस सेवा शुरु गर्न नगरपालिकाले निति तथा कार्यक्रममा समावेश गरिएको बताउँदै निशुल्क रुपमा सेवा सञ्चालन गर्न आवश्यक आर्थिक, भौतिक र प्राविधिक सहयोग गर्नुपर्ने नगरपालिकाको दायित्व रहेको भन्दै त्यसमा कुनै कसुर बाँकी नरहने बताउनुभयो । जनस्वास्थ्यको रक्षाका लागि नगरपालिका जिम्मेवार रहेको भन्दै उहाँले पर्वत अस्पतालको सेवालाई आगामी दिनमा थप प्रभावकारी बनाउन जनप्रतिनिधीहरु लागिपर्ने जनाउनुभयो । मेसिनरी सामग्रीको अवस्था, समस्या र समाधानका विषयमा अस्पताल व्यवस्थापन समिति र कर्मचारीहरुले नगरप्रमुख जोशी र उपप्रमुख सीता काफ्ले लामिछाने सँग छलफल गरेका थिए ।

उपप्रमुख लामिछानेले गुणस्तरीय स्वास्थ्य सेवा पाउनु नागरिकको अधिकार रहेको कुरा उल्लेख गर्दै पर्वत अस्पतालले दिने सबै सेवामा नागरिकहरुको कुनै पनि असन्तुष्टि नआओस भन्ने चाहना रहेको बताउनुभयो । उहाँले अब डायालासिस गर्न लाखौँ खर्चिनुपर्ने बाध्यता अन्त्य भएकोमा पनि खुशी व्यक्त गर्नुभएको छ । छलफलमा सहभागीहरुले डायलाइसिस सेवा शुचारु गर्नका लागि कुश्मा नगरपालिकाले महत्वपूर्ण सहयोग गरेकोमा धन्यवाद वयक्त गरे ।

अस्पताल विकास समितिका अध्यक्ष गोबिन्द पहाडीले हाल अस्पतालमा सञ्चालन भैरहेका सेवासुविधाको बारेमा जानकारी दिनुभयो । उहाँले कुश्मा नगरपालिकाले अस्पतालको सेवा र भौतिक पूर्वाधार विकासमा गरेको सहयोग अतुलनिय रहेको बताउनुभयो । पर्वत अस्पतालका प्रमुख डा= शिशिर देवकोटा, बिर अस्पताल काठमाडौँकी डायलासिस इन्चार्ज इन्दिरा गैरे,अस्पताल विकास समितिका सदस्य सोमबहादुर जिसी, डा. मानव तिवारी लगायतले कार्यक्रममा बोल्नुभएको थियो ।