Correspondent, ParbatNepal
5 years ago
1203
जेठ ३०, पर्वत । पर्वतका स्थानीय तहले भाइरल ट्रान्सपोर्ट मिडिया (भिटिएम) खरिद गरेका छन् । भारत र तेस्रो मुलुकबाट आउनेको संख्या बढेपछि कोरोना परिक्षणका लागि ७ सय भाइरल ट्रान्सपोर्ट मिडिया (भिटिएम) खरिद गरेका हुन् । जिल्लाको तथ्याँक अनुसार भारतबाट मात्रै २ हजार १ सय आउने र तेस्रो मुलुकबाट ५ हजार ५ सय जना फर्कने अनुमान गरिएको छ ।
कोरोना परिक्षणको दर बढाउनका लागि नमुना संकलन गरेर पोखरा स्थित प्रादेशिक जनस्वास्थ्य प्रयोगशाला सम्म श्वाब पठाउनका लागि भिटिएम खरिद गरिएको हो ।
पर्वतका सात स्थानिय तहले ७ सय भिटिएम खरिद गरेका हुन । हरेक पालिकाले १÷१ सयका दरमा भिटिएम खरिद गरेको जिल्ला प्रशासन कार्यालय पर्वतका प्रबक्ता तथा सहायक प्रमुख जिल्ला अधिकारी घनश्याम गौतमले जानकारी दिनुभयो । उहाँका अनुसार धेरै जसो पालिकाले खरिद गरेका भिटिएम आइसकेका छन ।
पर्वतका स्थानिय तहको समानुपातिक रुपमा खर्च हुने गरि कुस्माको गुप्तेश्वर बहुमुखी क्याम्पसमा ८० बेडको प्रि आइसोलेसन वार्ड तयार भएको छ भने यस अघि नै स्थानिय तहरुको खर्चमा २० बेडको आइसोलेसन अस्पताल सञ्चालनमा आइसकेको छ । कुस्मा र छिमेकी पालिकाहरुमा रहेका क्वारेन्टाईनको खर्च समेत पालिकाहरुले नै बेहोर्दै आएका छन ।