जेठ २५, पर्वत । पर्वतमा भारतबाट आउनेहरुको संख्या पनि थपिँदै गएको छ । भारतका विभिन्न शहरमा रोजगारीका लागि पुगेकाहरु कोरोना संक्रमण भारतबाट बढ्दै गएपछि घर सम्झिएर फर्किने क्रम बाक्लिएको छ ।

त्यसै क्रममा आईतवार शिवालय माविको क्वारेण्टाईनमा २५ जना आईपुगेका छन् । भारतबाट आएकाहरुलाई क्वारेण्टाईनमा राखिएको छ । क्वारेण्टाईनमा उनीहरुलाई राखिसकिएको प्रमुख जिल्ला अधिकारी शम्भुप्रसाद रेग्मीले जानकारी दिनुभयो ।

 क्वारेण्टाईनमा बस्नेहरुको संख्या बढ्दै गएको र व्यवस्थापनमा समस्या हुन थालेको पनि रेग्मीले बताउनुभएको छ । उहाँले शिवालय क्वारेण्टाईन भरिँदै गएपछि अव भारतबाट आउनेलाई मोदी गाउँपालिका स्थित नवजागृत मावि तिलाहार र फलेवास नगरपालिका ४ मुडिकुवा स्थित माटेदेवल माविको क्वारेण्टाईनमा पनि राखिने भएको छ । दुबै विद्यालयमा पूर्वाधार निर्माण भैरहेको छ । स्थानीय तहहरुको समन्वयमा जिल्ला कमाण्ड पोष्टले ति विद्यालयमा पुलिङ क्वारेण्टाईन बनाउन थालेको जनाईएको छ ।

स्वाव परिक्षण गरि नेगेटिभ नतिजा देखिएकालाई स्थानीय तहमै पठाईने भएकाले स्थानीय तहका क्वारेण्टाईनको क्षमता पनि बढाउनुपर्ने आवश्यकता देखिएको छ । एउटै गाउँका २०÷३० जना एकै पटक आश्रय लिन जानुपर्ने भएकाले पूर्व तयारी गर्न स्थानीय तहहरुलाई अनुरोध गरिएको छ । पछिल्लो पटक स्वाव परिक्षण गर्न पठाईएकाहरुमा कोरोना संक्रमण देखिने संभावना रहेकाले गुप्तेश्वर क्याम्पसमा आईसोलेसन बेडको क्षमता पनि बढाईएको छ ।

भारतबाट आउनेहरुलाई नै व्यवस्थापन गर्न समस्या पर्न थालिरहेको बेला तेस्रो मुलुकबाट पनि मानिसहरु आउने भएकाले क्वारेण्टाईन बढाउँदै लैजानुपर्ने आवश्यकता देखिएको छ ।