जेठ ४, पर्वत । जिल्ला अस्पताल पर्वतमा स्वास्थ्य सामग्री सहयोग गरिएको छ । जागृती बाल तथा युवा सरोकार नेपाल र क्यानालान स्विटजरल्याण्डको सहयोगमा जिल्ला अस्पतालमा आवश्यक स्वास्थ्य सामग्री सहयोग गरेको हो । विश्वभरि फैलिएको कोरोना भाइरस (कोभिड–१९) को रोकथाम र नियन्त्रणका लागि ४ लाख १५ हजार ७ सय ४८ रुपैयाँ बरावरको स्वास्थ्य सामग्री हस्तान्तरण गरेको हो । दुई संस्थाले अस्पताललाई ४० थान पीपीई, २ हजार ५ सय थान सर्जिकल ग्लोब्स ,३ हजार थान टप ग्लोब्स, १ हजार थान सर्जिकल मास्क ,१  सय थान के एन ९५ मास्क ,१ सय बोतल सेनिटाईजर तथा ५ थान थर्मलगन हस्तान्तरण गरेको हो ।

एक अनौपचारिक कार्यक्रमका विच जिल्ला समन्वय समिति पर्वतका प्रमुख मनोहर वि. पौडेलले सामाग्री हस्तान्तरण गर्नुभएको थियो । अस्पतालका अध्यक्ष गोविन्द पहाडी तथा मेडिकल सुपरिटेण्डेण्ट डा. शिशिर देवकोटाले ग्रहण गर्नुभएको थियो ।

ग्रहण पश्चात बोल्दै अध्यक्ष पहाडीले नेपालमा कोरोनाको महामारी प्रारम्भ हुन लागिरहेको समयमा प्राप्त सहयोग अति महत्वपूर्ण बनेको भन्दै यस्तै सहयोगले नै महामारी बाट बच्न र बचाउन थप बल पुग्ने बताउनुभयो । उहाँले यस अघि पनि बिभिन्न निकायबाट अस्पतालको लागि सहयोग जुटिरहेको भन्दै यो महामारीमा सबैले हातेमालो गर्दै अगाडि बढ्नुपर्ने बेला आउको बताउनुभयो ।

पहाडीको अनुरोधमा सहयोगी संस्थाका अध्यक्ष तथा मानवअधिकार एलाइन्सका केन्द्रिय सदस्य तिलोत्तम पौडेलले सो सामाग्री ब्यवस्थापन गरि प्रदान गर्नुभएको थियो ।