बैशाख २३, पर्वत । पर्वतका बैँकहरुले दिने सेवामा सेवाग्राहीको भीड नहुने विधि अपनाउन जिल्ला प्रसासन कार्यालयले निर्देशन दिएको छ । पछिल्लो समय बैँकहरुमा भीड बढेको र सामाजिक दुरी कायम नभएको पाईएपछि वैँकका प्रवन्धकहरु संग प्रसासनले सोमवार छलफल गरेको हो ।

बैँकर्स एसोसिएसनका पदाधिकारीहरु र बैँकका प्रवन्धकहरु प्रसासनले छलफल गरि भीड नगर्न र आलोपालो गरि सेवाग्राहीलाई बोलाएर सेवा दिने विधि अपनाउन प्रसासनले निर्देशन दिएको प्रमुख जिल्ला अधिकारी कल्पना घिमिरे नेपालले जानकारी दिनुभयो । सामाजिक सुरक्षा भत्ता र पेन्सन झिक्नेहरुका कारण बैँकमा भीड बढ्न थालेको हो ।

सकेसम्म जनप्रतिनिधी संग समन्वय गरि घरघरमै गएर भत्ता बाँड्ने विधि शुरु गर्न बैँकहरुलाई अनुरोध गरिएको प्रजिअ नेपालले जानकारी दिनुभयो । एक दिनमा बढिमा १५ जना मात्रै सेवाग्राहीलाई सेवा दिने व्यवस्था गर्न पनि प्रसासनले सुझाव दिएको छ । बैँकर्स एसोसिएसन पर्वतका अध्यक्ष गोबिन्द आचार्यले बैँकहरुलाई परेको समस्याका बारेमा अवगत गराउनुभएको थियो । उहाँले सेवाग्राहीलाई सेवा दिनुपर्ने र भीड पनि गर्न नहुने कुरालाई बिशेष ख्याल गर्दागर्दै पनि भीड बढेको बारेमा प्रसासनलाई जानकारी दिनुभयो । उहाँले भत्ता घरमै लगेर वितरण गर्न बैँकहरुले जनप्रतिनिधी संग समन्वय गर्ने र भेग छानेर सेवाग्राहीलाई सुचना पुराउने व्यवस्था गरिने बताउनुभयो ।

कुश्मामा रहेका २० वटा बैँकका प्रतिनिधी छलफलमा सहभागी भएका थिए । बिगत एक हप्ता देखि कुश्माका बैँकहरुमा सेवाग्राहीहरुको भीड बढेको छ । लकडाउनको बेला गाउँ गाउँबाट मानिसहरु सदरमुकाममा आउँदा लकडाउनको मर्मत समेत ओझेलमा परेको छ । बैँकमा देखिएको अस्वाभाविक भीडका कारण रोग फैलिने त्रास बढेको भन्दै प्रसासनले चासो दिएको हो ।